(Bindu Dinesh)
എല്ലായിടത്തും
തോറ്റുപോയവരുടെയുള്ളിൽ
ജീവിതം കിടന്നു കല്ലിച്ചതിന്റെ
ഒരടയാളം ഉറഞ്ഞുകിടക്കും.
പിന്നെയുള്ള ജന്മത്തിൽ
തലച്ചോറും അവയവങ്ങളും
എന്തിന് കോശങ്ങൾപോലും പുതുക്കപ്പെട്ടാലും
ആ കല്ലിപ്പ് അവിടെത്തന്നെയുണ്ടാകും...
ഒരുപാടിടങ്ങളിൽ നിന്ന്
തലകുനിച്ചിറങ്ങി പോന്നതിന്റെ വടുക്കൾ
പിൻകഴുത്തിൽ അപ്പോഴും കാണും
കൈകൾ, ഇല്ലാത്തൊരു താങ്ങുതേടി
അന്തരീക്ഷത്തിൽ വൃഥാ തുഴഞ്ഞുകൊണ്ടിരിക്കും ...
നിങ്ങൾക്കറിയാമോ ?
തോൽവി ഒരു ജനിതക വൈകല്യമാണ്.
നേരെ നിൽക്കാനാകാതെ
ഉലഞ്ഞുവീണു കിടക്കുന്ന
ആ ഇരട്ടപ്പിരി
ഡി എൻ എ ചുരുളുകൾക്കിടയിൽ
ആരുമറിയാതെ
അതിനുള്ള വിത്തുപാകപ്പെടുന്നു.
പിന്നീട് ഒരു പൈതൃകസ്വത്തുപോലെ
ഒരു രേഖകളും ആവശ്യമില്ലാതെത്തന്നെ
നമുക്കത് സ്വന്തമാകും.
തലമുറയിൽ നിന്ന്
തലമുറകളിലേക്ക് പടർത്താൻ
നമ്മുടെ തറവാട്ടുകോലായിലത്
നൂറ്റാണ്ടുകളോളം ചടഞ്ഞുകിടക്കും...!!
