നിന്നെ എഴുതാൻ
വാക്കുകൾക്കൊരു നിമിഷം മതി.
അൽപം നീണ്ടുനിവർന്ന്
സ്നേഹമെന്നെഴുതുമ്പോൾ
നിന്റെ ഉടലായി.
ചീകിമിനുക്കി വെച്ചിരിക്കുന്ന
നിലാവ് എന്നെഴുതുമ്പോൾ
ശിരസ്സ് തെളിയുന്നു.
ആഴ്ന്നിറങ്ങുന്ന ആ കണ്ണുകളെ
കടൽ എന്നുതന്നെ എഴുതിപ്പോകുന്നു.
മുഴുവൻ ചൂഴ്ന്നു നിൽക്കുന്ന
ആ ആവരണമുണ്ടല്ലോ...
അതിനെ വിവരിക്കാൻ
ഉന്മാദമെന്ന ഒറ്റവാക്കുമതി.
ഹൃദയമെഴുതാന്‍മാത്രം
ഒന്നും കിട്ടുന്നില്ല...
ചക്രവാളത്തിനപ്പുറം
എന്താണുള്ളതെന്ന്
ഞാനെങ്ങനെയറിയാനാണ്..??
