മികച്ച കവിതകൾ

(Bindu Dinesh)

അവസാന പക്ഷിയും
പറന്നു പോകുമ്പോൾ
വായുവിൽ ഒരു
ചിറകടി അവശേഷിക്കും.
കാറ്റ് അവിടെയെത്തുമ്പോൾ നിശബ്ദമാകും.
നിലാവവിടെ പൊഴിയാൻ മടിക്കും.
മുറിഞ്ഞു മുറിഞ്ഞു 
പെയ്യുന്നൊരു മഴ മാത്രം
ആർക്കോ വേണ്ടിയവിടെ 
ചാറിക്കൊണ്ടിരിക്കും. 

അവസാന പക്ഷിയും 
പറന്നുപോകുമ്പോൾ
ആകാശം പിന്നീട് ഇങ്ങിനെയാകില്ല.
ഒന്നിനു മുകളിലും കുട നിവർത്താൻ വയ്യ
എന്നു പറഞ്ഞങ്ങിനെ 
വ്യസനത്തോടെ കൂമ്പി നിൽക്കും.
ഒരു മഴവില്ലും പിന്നെയത് കാണില്ല
നക്ഷത്രങ്ങൾ പൂക്കുന്നൊരു 
മരച്ചില്ലമാത്രമാകുമത്.
കടലിനെ നോക്കി
തിരകളെണ്ണി
ശേഷിച്ചകാലം
അങ്ങിനെയങ്ങിനെയിരിക്കും ...!!