(Bindu Dinesh
എയ്തുവിട്ടോരമ്പ്
എന്നെങ്കിലും തിരിച്ചുവന്നിരുന്നെങ്കില്‍
ചോദിക്കാമായിരുന്നു
ഏത് ഇരയെത്തേടിയാണ്
കാളക്കൂറ്റനെപോലെ നീ
മുരണ്ട് പാഞ്ഞതെന്ന്.....
പലതെറ്റുകള്‍ മുറിച്ചുവെച്ചപോലെയുള്ള
ചില വഴുവഴുത്ത സ്വത്വങ്ങളിലേക്ക്
എങ്ങിനെ നീ നിന്‍റെ കൂര്‍ത്തമുന
കൃത്യമായി കൊള്ളിച്ചെന്ന്....
പൂക്കള്‍പോലും
കൂര്‍ത്ത കൊമ്പുമായി വിരിയുന്ന ഇക്കാലത്ത്
അമ്പുകൊള്ളേണ്ടൊരു ശിരസ്സിനെ
കൂട്ടത്തില്‍ നിന്നെങ്ങിനെ
തിരഞ്ഞുപിടിച്ചെന്ന്...
അമ്പെയ്ത്തില്‍ ഒരു റിസ്കുമില്ല..
അവയുടെ കണ്ണുകളെപ്പോഴും
മുന്നിലേയ്ക്കു മാത്രമാണ്.....
തിരിഞ്ഞുനോക്കിയാല്‍ മാത്രമേ
അതെന്നെ കണ്ടെത്തുകയുള്ളൂ
എന്നതൊരു മഹാഭാഗ്യം തന്നെ..........!!!!!
