(സതീഷ് വീജീ)
"സുഗുമാമാ സുഗുമാമാ എന്നാ ഈ കൊറോണ തീരുന്നത്?" മഴ കാരണം വാർക്കപ്പണി ഇല്ലാത്ത കുറവ് മാറ്റാൻ എടുത്ത കാരുണ്യ ലോട്ടറി ഫലം നോക്കി മുടക്കുമുതൽ പോയ വിഷമത്തിൽ ഇരുന്ന പള്ളിവേട്ട സുകുവിനോടാണ് പെങ്ങളുടെ ഇളയ കുരുപ്പ് ഈ ചോദ്യം ചോദിച്ചത്.
സാക്ഷാൽ പടച്ചതമ്പുരാനുപോലും ഉത്തരം കിട്ടാത്ത ചോദ്യമാണ് ചെറുക്കൻ ചോദിച്ചേക്കുന്നത്.
എന്തെങ്കിലും ഉത്തരം പറഞ്ഞേ പറ്റൂ
"അത് പിന്നെ ഈ കൊറോണ വൈറസ് എല്ലാം ചാകുമ്പോൾ കൊറോണയും തീരും "
അവിടേം ഇല്ല ഇവിടേം ഇല്ല എന്ന രീതിയിൽ പള്ളിവേട്ട സുകു ഒരു കാച്ചു കാച്ചി
"വൈറസ് എന്നാ ചാകുന്നത് "
കുരിപ്പ് വിടുന്ന മട്ടില്ല
" അതോ അത് ഈ വാക്സിൻ ഇല്ലേ അതെടുത്താൽ പിന്നെ കൊറോണ വൈറസ് ആരുടേയും ദേഹത്ത് കേറില്ല. അപ്പോൾ പിന്നെ ആഹാരം കിട്ടാതെ വിശന്നു വലഞ്ഞു ഊപ്പാട് വന്നു വൈറസ് മരിക്കും "
"അല്ലപിന്നെ നമ്മളോടാ കളി " എന്ന മുഖഭാവത്തോടെ സുകു ഇരിന്നു.
"മാമൻ വൈറസിനെ കണ്ടിട്ടുണ്ടോ "
" പിന്നേ ഇന്നലെ വൈകുന്നേരം റേഷൻകടയിൽ പോയപ്പോൾ അതിഭീകരന്മാരായ അഞ്ചു വൈറസുകൾ നമ്മുടെ ആഹ്ലാദം ആനന്ദന്റെ പറമ്പിൽ ഇരുന്നു ഗുലാം പരിശു കളിക്കുന്നു. മാമനെ കണ്ടതും ലവന്മാർ പാഞ്ഞു കളഞ്ഞു " എടാ കൊച്ചനെ ഈ വൈറസിനെ ഒന്നും കാണാൻ പറ്റൂല്ല. തീരെ ചെറുതാ നമ്മുടെ കണ്ണ് കൊണ്ട് നേരിട്ട് കാണാൻ പറ്റില്ല " ജീവശാസ്ത്രത്തിലുള്ള തന്റെ അഗാധമായ അറിവ് പറഞ്ഞു കൊടുത്ത ഗറ്റപ്പിൽ സുകു ഞെളിഞ്ഞിരിന്നു.
" ഈ സുഗുമാമന് ഒന്നും അറിയില്ല. എപ്പഴും കള്ളമേ പറയൂ അമ്മ പറഞ്ഞല്ലോ ഇതാണ് കൊറോണ വൈറസ് എന്ന്. ദേ റംബൂട്ടാന്റെ പോലെ. ഇതിനെ കാണാല്ലോ. ദേ ഞാൻ കണ്ടു. അമ്മേം കണ്ടു. മാമൻ പറയുന്നു കാണാൻ പറ്റില്ലാന്ന്. കള്ള മാമൻ " മനോരമ ദിനപത്രത്തിലെ ഉഗ്രൻ ഒരു കൊറോണയുടെ ഫോട്ടോ എടുത്തു പിടിച്ചുകൊണ്ട് കുരുപ്പ് പറഞ്ഞു.
കിളിപോയ പള്ളിവേട്ട സുകു ഉത്തരം ഇല്ലാതെ തകർന്നു തരിപ്പണമായി താടിക്കു കൈ കൊടുത്ത് ഇരുന്നുപോയി.
