(Sreekala Mohandas)
കരളിന്റെ കിളിവാതിൽ കൊട്ടിത്തുറന്നേതോ
മധുരമാം ഗാനത്തിൻ ഈണമെത്തി
അരിയൊരാ ഗാനത്തിൻ വായ്ത്താരി കേട്ടെന്റെ
തരളമാം മാനസം നൃത്തമാടി ( കരളിന്റെ )
മഴമേഘം കണ്ടോരു മയിൽപ്പേടപോൽ മനം
മരതകപ്പീലി വിടർത്തിയാടീ.
നിദ്രയിൽ കണ്ടോരു സ്വപ്ന മരാളങ്ങൾ
മഴവില്ലിൻ തേരേറി വന്നതാവാം..... ( കരളിന്റെ )
പണ്ടെങ്ങോ കേട്ടൊരാ ഹൃദ്യമാം ഗാനത്തിൻ
ഓർമ്മ മനസ്സിൽ പുനർജ്ജനിക്കേ.....
തേടുന്നു ഞാനിന്നും വീണ്ടുമാ ഗാനത്തെ
ഒരുവട്ടം കൂടൊന്നു പുൽകിടാനായ് ( കരളിന്റെ )
