കവിതകൾ

(Saraswathi T)

വാക്കുകൾ വർണചിത്രങ്ങൾ വരയ്ക്കുന്ന
വാസരസ്വപ്നം നിറഞ്ഞൊരാ നാളുകൾ

ഏകാന്തമെൻ മനമേറെയായോമനി-
ച്ചാനല്ല സ്വപ്നങ്ങളെങ്ങോമറഞ്ഞുപോയ്

ഏതോവനാന്തര ഗൂഢതയെപ്പൊഴും
ആരുമറിയാതെ പിന്തുടർന്നെത്തുന്ന 

പേടിപ്പെടുത്തുന്ന ചിന്തകൾ പോലവ -
യാഞ്ഞു കൊളുത്തി വലിക്കുന്ന വേദന,,, ,

കണ്ണൊന്നു ചിമ്മിയാൽ വർണശബളിത
ഭംഗിയിലെത്രയോ കാഴ്ചകൾ കണ്ടു ഞാൻ! 

ഒരു മുളന്തണ്ടിൽ നിന്നുയരുന്ന രാഗമായ്
ഒരു ഗോപവാടം നിറയുന്ന ഗാനമായ് 

വർണങ്ങളിൽ നൽ വസന്തംവിടർത്തിയ
നന്മനിറഞ്ഞൊരാനല്ല ദിനങ്ങളെ

വീണ്ടുമാവാഹിച്ചെടുക്കുവാൻ മായികാ-
പിഞ്ഛികാജാലത്തിനായിടാമെങ്കിലും 

ശൂന്യതയേറെ നിറഞ്ഞു വിങ്ങുന്നൊരെൻ
ചേതനയെന്തേയൂണരാഞ്ഞു പിന്നെയും!

എന്റെ സ്വപ്നങ്ങളിലെന്റെമോഹങ്ങളിൽ
നന്മകൾ മാത്രം വിടർത്തുന്ന ചിന്തകൾ

ഭാസുരമായ് വീണ്ടുമൊന്നണഞ്ഞീടുവാൻ
ഭാവനേ നീയെത്തുകില്ലേ യരികിലായ്!