മരണം തടുക്കാൻ പഠിക്കാഞ്ഞതോ
ദൈവത്തിൻ നാട്ടിൽ പിറവിയെടുത്തതോ?
മോഹങ്ങളണയാതെ കാലം കഴിച്ച,
നിൻ ജന്മമിന്നറിയാതെ ചെയ്തൊരു തെറ്റ്?
ജീവൻ ത്യജിക്കുവാനായിരുന്നില്ല,
നീയീ മണ്ണിൽ പിറന്നതെന്നു;
ലഹരിയിൽ ജന്മം ഹോമിച്ചൊരുവന്റെ,
കാതുകളിലാരും ചൊല്ലിയില്ല!
നിൻ കരസ്പർശത്താ,ലെത്രയോ
രോഗങ്ങൾ മോക്ഷം കൊതിച്ചിരിപ്പാണതെന്നും;
ബുദ്ധി നശിച്ചൊരു മർത്ത്യന്റെ നേർക്കാരും
നല്ലതാം വാക്കുകളെറിഞ്ഞതില്ല!
നീയൊഴുക്കിയ രക്തപ്പുഴയി-
ലില്ലാതെയായതെത്ര വിശ്വാസങ്ങൾ;
മണ്ണോടലിഞ്ഞതെത്രയോ മോഹങ്ങൾ,
കണ്ണീരിലാഴ്ന്നതെത്രയോ ജന്മങ്ങൾ!
