കവിതകൾ

(Saraswathi T)

പകലിതാ യാത്രപറയാനൊരുങ്ങുന്നു
പതിയെ തിരിഞ്ഞു നോക്കുന്നു..

കൊടിയൊരാചൂടിൽ തളരുന്നപൂക്കളെ-
ത്ത ഴുകിയെത്തുന്നിളം തെന്നൽമെല്ലെ.

കോകിലരാഗമധുവീചികൾ സ്വച്ഛ
സാന്ദ്രമാക്കുന്നീ പ്രകൃതിയെങ്ങും ..

ഇനിയുമുണ്ടിവിടെ വിരിയുവാനൊരുനൂറു
നവനവസ്വപ്നങ്ങളെന്നോതുവാൻ.

കരിയുന്നചില്ലയിൽ പുതുനാമ്പുകൾപോലെ
കമനീയകാഴ്ചയൊരുക്കിടുന്നു

പച്ചിലച്ചാർത്തിനെ തരളിതമാക്കുവാ-
നെത്തും പുതുവർഷമിങ്ങുവീണ്ടും,

നാളെ പുലരിയിൽ നീഹാരബിന്ദുവാൽ
നീ തീർക്കുമല്ലോ നവമാലിക

ദൂരെനിന്നെത്തിടുംചേണെഴുമീണത്തി_
ലാലോലമാം നല്ലവേണുഗാനം

പുത്തൻപ്രതീക്ഷകൾ പിന്നെയുംപിന്നെയും
സ്വപ്നങ്ങളായി വിരിഞ്ഞിടട്ടെ.

കേവലാനന്ദംപകർന്നു മതിവരെ
ജീവനിൽ ജീവനായ് സ്നേഹിക്കുവാൻ

നാളെ വിഭാതതാരം വന്നു വാനിൽ
വിരിയുമ്പോഴെത്തിടാനായി മാത്രം

ഇന്നത്തെയോർമതൻപൂക്കാലമോർമ്മയിൽ
എന്നും വിളങ്ങി വിരാജിച്ചിടും

ഇത്തിരി നാഴികമാത്രമാണെങ്കിലു_
മത്രയ്ക്കനിവാര്യമീ വിരഹം...!