അമ്മയെ കാണാതെയച്ഛനെ കാണാതെ
ആരോമല്‍ പൈതലുറക്കമായി
താരാട്ടു പാട്ടിന്‍റെയീണങ്ങള്‍ കേള്‍ക്കാതെ
താരിളം പൈതലുറക്കമായി
രാവിലെ നേരത്ത് അച്ഛനുമമ്മയും
അക്കരെക്കായലില്‍ പോയതാണ്
കായലിന്നാഴത്തിലാണ്ടു കിടക്കുന്ന
കക്ക പെറുക്കുവാന്‍ പോയതാണ്
മാനത്തു മൂടിയ കാര്‍മേഘത്തുണ്ടുകള്‍
കാലത്തുയെത്രയും പെയ്തിരുന്നു
കക്കപെറുക്കുവാന്‍ മുങ്ങിയ നേരത്തു
കാണാക്കയത്തിലേക്കാഴ്ന്നുപോയി
അഞ്ചില്‍ പഠിക്കുന്നപെണ്ണിനെയേല്‍പ്പിച്ച്
ആരോമല്‍ കുഞ്ഞിനെയോമനിച്ച്
കക്കപെറുക്കുവാന്‍ പോയൊരുകുഞ്ഞിന്‍റെ
അച്ഛനുമമ്മയും വന്നതില്ല
അന്തികഴിഞ്ഞിട്ടും അമ്മയെ കാണാഞ്ഞു
അന്തിച്ചു നിന്നവളാകുടിലില്‍
കുഞ്ഞുണര്‍ന്നുക്കരഞ്ഞിടും നേരമായ്‌
അമ്മിഞ്ഞപ്പാലു നുകര്‍ന്നിടുവാന്‍
തോരാതെ പെയ്യുംമഴയത്തുയന്നേരം
നാലഞ്ചുപേരങ്ങു ഓടിയെത്തി
നാലയല്‍പക്കത്തടക്കം പറഞ്ഞതും
നാടു മുഴുവനുമെത്തി വീട്ടില്‍
രാവിലെപോയൊരു അച്ഛനുമമ്മയും
രാവേറെ ചെന്നപ്പോള്‍ വീട്ടിലെത്തി
നിശ്ചലം! മൂടിപ്പൊതിഞ്ഞത്തുണിക്കെട്ടില്‍
കണ്ണുമടച്ചു കിടന്നിടുന്നു
പൊട്ടിക്കരച്ചിലിന്നലയടിയൊച്ചയില്‍
ആ കുടിലാകെയും ശോകമായി
ചൂടിക്കയറിനാലിഴനെയ്തോരേണിയില്‍
ആകായത്തെത്തുവാന്‍ പോകയായി
കല്ലുവെട്ടാംക്കുഴിയ്ക്കപ്പുറത്തുള്ളോരു
കല്ലറപൂകുവാന്‍ നേരമായി
കുഞ്ഞിനെയഞ്ചിലെപെണ്ണിനെയേല്‍പ്പിച്ച്
ഒന്നുംപറയാതവര്‍ യാത്രയായി
കണ്ണീരുത്തൂവിവിളിച്ചുകൊണ്ടെപ്പോഴൊ
കുഞ്ഞുണര്‍ന്നങ്ങു കരച്ചിലായി
കുഞ്ഞിനെത്തോളില്‍ കിടത്തിയാപെണ്‍കൊടി
ഉമ്മറത്തിണ്ണയില്‍ ചെന്നിരുന്നു
അമ്മയുമച്ഛനും വന്നില്ലിതുവരെ
അക്കരെ കായലില്‍ പോയതാണ്
കക്കയും വാരിക്കഴിഞ്ഞില്ലേയിപ്പോഴും
എന്തെയിങ്ങെത്തുവാനിത്രനേരം.
