അർഥശൂന്യമായി മാറുന്നു ജീവിതം
സ്നേഹബന്ധങ്ങളൊന്നുമില്ലെങ്കിൽ!
സ്നേഹിക്കാനായിട്ടൊരാളെങ്കിലും കൂടെ
വേണമെന്നാഗ്രഹമില്ലാതുണ്ടോ!
നമ്മുടെ മനസ്സിൻ വിചാരങ്ങൾ പങ്കു-
വയ്ക്കാനായിട്ടു നമ്മുടെയൊപ്പം...
നല്ല കൂട്ടുകാരുണ്ടാവുകയാണെങ്കിൽ,
ആശ്വാസമാകില്ലേ ജീവിതത്തിൽ!
ആത്മമിത്രങ്ങൾക്കല്ലാതെയാർക്കെങ്കിലും
സാധിക്കുമോ നമ്മുടെ മനസ്സിൻ...
വ്യാകുലതകൾക്കൊരത്താണിയായിട്ടി-
ന്നോതുവാൻ, ആശ്വാസവാക്കുകളെ!
കാലചക്രമിനിയെത്രയുരുണ്ടാലും
ജീവിത പന്ഥാവു മാറിയാലും...
സ്നേഹബന്ധത്തിനൊന്നുമൊരു കോട്ടവും
തട്ടാതെ നിൽക്കുന്നു ജീവിതത്തിൽ.
നല്ല സുഹൃത്തുക്കളെ സമ്പാദിക്കുക-
യത്ര എളുപ്പമല്ലെന്നാകിലും...
വന്നുചേർന്നിടുന്നു നല്ല മിത്രങ്ങളും
നാമറിയാതെതന്നെ നമ്മളിൽ.
