മറ്റുള്ളവരെ നിയന്ത്രിക്കാൻ കാലാകാലങ്ങളായി മനുഷ്യർ ഉപയോഗിച്ചുവരുന്ന ഒരുപകരണമാണ് "ദൈവം". അധികാരത്തിലെത്താനും, സാമ്രാജ്യങ്ങൾ സ്ഥാപിക്കാനും, സിംഹാസനങ്ങൾ നിലനിർത്താനും അത് ഫലപ്രദമായി ഉപയോഗിച്ചുവരുന്നു. അജ്ഞാതനായ ദൈവമേ! നിന്റെ പരിലാണല്ലോ ഞങ്ങളുടെ ഈ ഭൂമിയിൽ ഏറ്റവും കൂടുതൽ കുരുതി നടത്തിയിട്ടുള്ളത്. അതിന്നും അവിരാമമായി തുടരുകയാണല്ലോ...

യൂറോപ്പിലെ-മദ്ധ്യകാലഘട്ടം 

യൂറോപ്പിന്റെ ചരിത്രത്തിൽ അഞ്ചാം നൂറ്റാണ്ടു മുതൽ പതിനഞ്ചാം നൂറ്റാണ്ടു വരെയുള്ള കാലഘട്ടത്തെ മദ്ധ്യകാലഘട്ടം എന്നു വിശേഷിപ്പിക്കുന്നു. അന്നുണ്ടായിരുന്ന ജന്മികുടിയാൻ (feudalism)  സമ്പ്രദായത്തിൽ

ഭൂമിയുടെ ഉടമകൾ രാജാക്കന്മാരും പ്രഭുക്കന്മാരും പുരോഹിതന്മാരും (ബിഷപ്പ്) ആയിരുന്നു. റോമാ സാമ്രാജ്യത്തിന്റെ അധഃപതനത്തോടെ സാംസ്കാരികമായ അപചയം ആരംഭിച്ച യൂറോപ്പിൽ  ഇരുണ്ട കാലഘട്ടം ആയി അറിയപ്പെട്ട ഈ കാലഘട്ടം പിൽക്കാലത്തിൽ നവോത്ഥാനത്തിനും (renaissance) പര്യവേക്ഷണങ്ങളുടെ  (Age of Discovery) കാലഘട്ടത്തിനും വഴി തെളിച്ചു. യൂറോപ്പിന്റെ ജനസംഖ്യ ഏകദേശം പകുതിയായി കുറച്ച പ്ലേഗും, വ്യാപകമായ ക്ഷാമങ്ങളും, ഈ കാലഘട്ടത്തിന്റെ പ്രത്യേകതകളായിരുന്നു. നിലവിലുണ്ടായിരുന്ന ക്രിസ്തു മതത്തിന്റെ യഥാസ്ഥിതികമായ നിലപാടുകളെ ചോദ്യം ചെയ്തിരുന്നവരെ ദൈവ നിഷേധികളായി മുദ്രകുത്തുകയും കഠിനമായി പീഡിപ്പിക്കുകയും ചെയ്തിരുന്നു. 

കുരിശുയുദ്ധങ്ങൾ

യുദ്ധങ്ങൾ എന്തിനു വേണ്ടി ആണെങ്കിലും മനുഷ്യരാശിയുടെ മരണത്തിൽ കലാശിക്കുന്നു. അപ്പൊളതു സൃഷ്ടികർത്താവായി കരുതപ്പെടുന്ന ദൈവത്തിന്റെ പേരിലാണെങ്കിലോ, അതേറ്റവും നീചമായ കാര്യമാണ്. ദൈവ നിഷേധമാണ്. ദൈവ വിശ്വാസികളായ ക്രിസ്ത്യാനികളും മുസ്ലീങ്ങളും, തങ്ങളുടെ ഏക ദൈവത്തിനു വേണ്ടി പരസ്പരം കൊന്നൊടുക്കി. എന്താ തമാശ! ഇതിലൊന്നും ദൈവം ഇടപെട്ടില്ല. രണ്ടു മതങ്ങളിലെയും പരമോന്നത പദവിയിലുള്ള പുരോഹിതർ യുദ്ധത്തിനു ആഹ്വാനം നൽകി. അതെ, അവർ കൊല്ലാൻ പറഞ്ഞു. പരമ കാരുണികൻ എന്നും സ്നേഹ സാഗരം എന്നും വിളിക്കപ്പെടുന്ന ദൈവത്തിനു വേണ്ടിയാണെന്ന് ഓർക്കണം.

1096 നും 1291 നും ഇടയ്ക്കു എട്ടു വലിയ കുരിശു യുദ്ധങ്ങൾ നടന്നു.

ഒരു പ്രദേശത്തിന്റെ പ്രാധാന്യം

ക്രിസ്തുവിനും മുൻപുണ്ടായിരുന്ന ഒരു ചെറിയ ഭൂവിഭാഗം ചരിത്രത്തിൽ ഒരുപാടു യുദ്ധങ്ങൾക്കുള്ള കാരണമായിത്തീരുന്നു. ക്രിസ്തുവിനും എത്രയോ മുൻപ് ബൈസാന്തിയും എന്നും ക്രിസ്തുവിനും 330 വർഷങ്ങൾക്കു ശേഷം കോൺസ്റ്റാന്റിനോപ്പിൾ എന്നും അറിയപ്പെട്ടിരുന്ന ഇന്നത്തെ ഇസ്‌താംബുൾ (തുർക്കിയിലെ) ആണു കഥയിലെ വില്ലൻ. ഏഷ്യയ്കും പശ്ചിമ യൂറോപ്പിനും ഇടയ്ക്കുള്ള കവാടമാണ് ഇസ്‌താംബുൾ. അതേപോലെ തന്നെ മധ്യതരണ്യാഴിയ്ക്കും കരിങ്കടലിനും മധ്യേയുള്ള കവാടവും ആണ്‌ ഇസ്‌താംബുൾ. രണ്ടു ഭൂഖണ്ഡങ്ങൾ തമ്മിലുള്ള ആൾ / ചരക്കു ഗതാഗതത്തെ നിയന്ത്രിക്കാൻ ഈ കവാടത്തിന്മേലുള്ള നിയന്ത്രണം അധികാരി വർഗ്ഗത്തിനു ആവശ്യമായിരുന്നു.

വിശുദ്ധ മതവിചാരണ അഥവാ ഹോളി ഇൻക്വിസിഷൻ 

നിലവിലുള്ള കത്തോലിക്കാ മതവിശ്വാസങ്ങൾക്ക് ചേരാത്ത ആചാരങ്ങളും, അനുഷ്ഠാനങ്ങളും, വിശ്വാസങ്ങളും വച്ചുപുലർത്തിയിരുന്നവർക്കെതിരെ ക്രിസ്തുമതം നടത്തിയ വിചാരണയും, ശിക്ഷയും മനുഷ്യ ചരിത്രത്തിലെ ഏറ്റവും ബീഭത്സമായ ഏടുകളിൽ ഒന്നാണ്.

ദൈവമേ, ഇതും നിന്റെ പേരിൽ തന്നെ ആണല്ലോ നടത്തിയിരുന്നത്. പന്ത്രണ്ടാം നൂറ്റാണ്ടിലാണ് ഈ പ്രാകൃത കൃത്യം ആരംഭിച്ചത്. നിലവിലുണ്ടായിരുന്ന റോമൻ മതസംസ്കാരത്തിനു വിരുദ്ധമായിരുന്നതിനാൽ ആദ്യകാല ക്രിസ്തുമത വിശ്വാസികളെ സമൂഹത്തിൽ ഒറ്റപ്പെടുത്തുകയും, തരം താഴ്ത്തുകയും, സ്വയം ബലി വരിക്കാൻ നിർബന്ധിക്കുകയും, കൂട്ടമായി ക്രൂരമായി കൊലപ്പെടുത്തുകയും ച്യ്തിരുന്നു. പിന്നീട് ക്രിസ്തുമതം ശക്തിപ്രാപിച്ചപ്പോൾ ഇതേ പ്രവർത്തിതന്നെയാണ് മറ്റു മതവിശ്വാസികളോടും, അവിശ്വാസികളോടും ക്രിസ്തുമതവും ചെയ്തത്. സ്നേഹത്തിന്റെയും, കാരുണ്യത്തിന്റെയും മതം, ദൈവത്തിന്റെപേരിൽ അനേകലക്ഷം മനുഷ്യരെയാണ് ക്രൂരമായി പീഡിപ്പിക്കുകയും, കൊല്ലുകയും ചെയ്തത്.

പൊതുവെ ഇത്തരം മതവിചാരണകൾ 'ഇൻക്വിസിഷൻ' എന്ന ഓമനപ്പേരിലാണ് അറിയപ്പെടുന്നത്. മനുഷ്യരിലുണ്ടായ ജ്ഞാനത്രിഷ്ണയെയും, നവോദ്ധാനദാഹത്തെയും, സ്വാതന്ത്ര്യാഭിവാഞ്ഛയെയും തല്ലിക്കെടുത്തുക എന്നതായിരുന്നു ഇതിന്റെ പിന്നിലുണ്ടായിരുന്നു ഗൂഢലക്ഷ്യം. റോമൻ ഇൻക്വിസിഷനും, സ്പാനിഷ് ഇൻക്വിസിഷനും, പോർട്ടുഗീസ് ഇൻക്വിസിഷനും വളരെയധികം കുപ്രസിദ്ധി നേടിയിരുന്നു. ഏഷ്യയിലും, യൂറോപ്പിലും, ആഫ്രിക്കയിലും എവിടെവിടെ അവർ ഭരിച്ചിരുന്നുവോ, അവിടങ്ങളിലെല്ലാം ഇൻക്വിസിഷൻ നടത്തി.

പോർട്ടുഗീസുകാർ ഭരിച്ചിരുന്ന ഗോവയിൽ, 1560ൽ തുടങ്ങി, 1820ൽ നിറുത്തലാക്കിയ ഗോവൻ ഇൻക്വിസിഷൻ ഇന്ത്യയുടെ ചരിത്രത്തിലെ കറുത്ത അദ്ധ്യായമാണ്. ഹിന്ദുക്കൾക്കും, മുസ്ലീങ്ങൾക്കും, യഹൂദർക്കും എതിരായുള്ള ക്രൂരമായ നീക്കമായി ഇതിനെ ചരിത്രകാരൻമാർ വിലയിരുത്തുന്നു. 16000 പരം ആളുകളെ കുറ്റവിചാരണ നടത്തിയതായും, അനേകരെ ക്രൂരമായി പീഡിപ്പിക്കുകയും, പീഡനങ്ങളെ അതിജീവിച്ച അനേകരെ ക്രൂരമായി കൊല്ലുകയും ചെയ്തിരുന്നു. വിശുദ്ധനെന്നു കരുതപ്പെടുന്ന ഫ്രാൻസിസ് സേവ്യറുടെ ആവശ്യപ്രകാരമാണ് ഗോവൻ ഇൻക്വിസിഷൻ നടപ്പിലാക്കിയതെന്നു ഒരു കൂട്ടം ചരിത്രകാരൻമാർ ശക്തമായി വാദിക്കുന്നു. ക്രിസ്തുമതത്തിലേക്കു പരിവർത്തനം ചെയ്യപ്പെട്ടിരുന്നവർ, തങ്ങളുടെ പഴയ ആചാരങ്ങളോ, ആഘോഷങ്ങളോ രഹസ്യമായി തുടരുന്നുവോ എന്നു സംശയിക്കപ്പെട്ടാൽ ഇൻക്വിസിഷൻ ഉറപ്പായിരുന്നു. ജെസ്യൂട്ട് വിഭാഗത്തിലെ പുരോഹിതർ ആയിരുന്നു ഇതു നടപ്പിലാക്കിയിരുന്നത്. ഇൻക്വിസിഷൻ പ്രകാരം, ഹിന്ദുമതത്തിലേക്കോ, ഇസ്‌ലാം മതത്തിലേക്കോ, യഹൂദ മതത്തിലേക്കോ ഉള്ള പുതു ക്രിസ്ത്യാനികളുടെ തിരിച്ചുപോക്കും കുറ്റകരമായിരുന്നു.

എന്റെ ദൈവമേ, ഇതും നിന്റെ പേരിലായിരുന്നു.