മികച്ച കവിതകൾ

 

(T V Sreedevi )

 

പ്രണയ സങ്കൽപങ്ങ-
ളെന്റെ കിനാവിലും
മൃദുപദം വച്ചു കടന്നു വന്നു!
അറിയാതെയറിയാതെ
യൊരു സുഖ ശീതള ലഹരി
പടർന്നുവെൻ ഹൃത്തിലാകെ.

പ്രണയത്തിൻ പ്രാവുകൾ കുറുകിയെത്തീ-
യെന്നിൽ മധുരമൊ-
രനുഭൂതിചേർത്തു വച്ചു.

പുല്ലിലും പൂവിലു-
മെല്ലാം നിറയുന്നു
പ്രണയം പൊഴിക്കും 
നറു സുഗന്ധം.

യമുനയിലോളങ്ങൾ
തീർക്കുന്ന കണ്ണന്റെ
മുരളി പൊഴിക്കുന്ന
ഗാനാമൃതം;

വിരഹിണി രാധയി-
ലൊഴുകുന്ന പ്രണയത്തി-
ന്നരുമയാം ശീലുകൾ
ചേർത്ത പോലെ..

പ്രണയ സങ്കൽപ്പങ്ങ-
ളെന്റെ  മനസ്സിലും,
അതിലോല ഭാവങ്ങൾ
വിരിയിച്ചുവോ?

കാളിദാസന്റെ
പ്രണയ സങ്കല്പത്തിൽ,
പിറവിയെടുത്ത
മധുരകാവ്യം.

ശാകുന്തളത്തിൽ
ശകുന്തളയെഴുതിയ,
താമരയിലയിലെ-
പ്രണയലേഖം.

ഇണയെ പിരിഞ്ഞൊരു
യക്ഷന്റെ ദുഃഖത്തിൽ,
പിറവിയെടുത്ത
വിരഹഗാനം.

പത്നി തൻ വേർപാടിൽ
ഹൃദയം തകർന്നൊരു,
ഷാജഹാൻ നിർമ്മിച്ച
താജ് മഹലും...

ഇവയെല്ലാം പ്രണയ
സങ്കല്പങ്ങൾ വിരിയിച്ച,
മധുരാനുഭൂതി തൻ
ചിത്രമല്ലേ!

പ്രണയമില്ലാതെന്തു
ജീവിതം ഭൂമിയിൽ!
പ്രണയത്തെ ഹൃദയത്തിൽ

കുടിയിരുത്താം.