നേരത്തേ നേരം വെളുക്കുമെന്നും
നേരെയുറങ്ങുവാൻ നേരമില്ല
കാലത്തേ ഏറ്റമ്മ ദോശ ചുട്ടു
ചട്ട്ണിയാകുവാൻ നേരമാവും
പട്ടിണിയാകുവാൻ വയ്യെന്റമ്മോ
കട്ടനും കൂട്ടി ഞാൻ ദോശ തിന്നൂ
പുസ്തകം സഞ്ചിയും പേനയെല്ലാം
തപ്പിയെടുക്കേണമിപ്പോൾ തന്നെ
പല്ലെത്രനേരമായ് തേയ്ക്കുന്നു ഞാൻ
കക്കൂസ്സിൽപോകുവാനെത്ര നേരം
ഇപ്പോൾ കുളിക്കുവാൻ നേരമില്ല
വയ്യിട്ടു വന്നിട്ട് തോട്ടിൽ മുങ്ങാം
കുപ്പായമെ ങ്ങെന്റെ നിക്കറെങ്ങ്
നല്ല ചെരുപ്പേതോ പട്ടി കപ്പി
ഇന്നിനി ഒന്നിനും നേരമില്ല
പള്ളു ക്കൂടത്തിലെ ബെല്ല് കേട്ടൂ
പോണവഴിക്കെല്ലാം ചങ്ങായ്ക്കൂട്ടം
കല്ലേറ് കൊള്ളാനോ പട്ടിക്കൂട്ടം
ചൂണ്ടയിട്ടോണ്ടോരു കുഞ്ഞിക്കൂനൻ
തോട്ടുവക്കത്തൊരു വെള്ളക്കൊറ്റി
ചാണകം കണ്ടാൽ ചവിട്ടീടല്ലേ
നാണക്കേടല്ലിനി തല്ലും കെ കിട്ടും
ഒറ്റമൈനെക്കണ്ടാൽ ചുറ്റും നോക്കും
മറ്റേ മൈനെക്കണ്ടാൽ ദുഃഖം തീരും
ഉത്തരം തെറ്റിയാൽ തോലുപൊട്ടും
ഉത്തരം ചോദിച്ചാൽ ശ്ലേറ്റും ചൊല്ലും
എന്തൊക്കെയാണെന്റെ പുസ്തകത്തിൽ
വേണ്ടാത്ത ചോദ്യത്തിനുത്തരങ്ങൾ
തോട്ടിലെ വെള്ളത്തിൽ പുള്ളിപ്പള്ള
പാടത്തെ പുന്നെല്ലിൽ പച്ചത്തത്ത
പാതയിൽ കുണ്ടിലീകുണ്ടൻ മാക്രി
തക്കവും നോക്കിയീ ചേരക്കുഞ്ഞും
ആകെ നനയ്ക്കാനീ കാലവർഷം
ആകെയുള്ളീക്കുട പണ്ടേ കീറി
ഒന്നല്ല രണ്ടല്ല മൂന്നാളല്ല
എല്ലാർക്കും കേറാനീപ്പൊട്ടക്കുട
ഗൃഹപാഠം ചെയ്തവർ വന്നിട്ടില്ല
കണ്ടെഴുതാനിനി നേരമില്ല
മാഷിന്റെ കയ്യിലെ ചൂരൽക്കമ്പ്
ഓർക്കുമ്പോഴേയ്ക്ക് ഞാൻ മുള്ളിപ്പോയീ
ബെല്ലടിച്ചിട്ടെത്ര നേരമായി
ഒന്നാമൻ മാഷിനെ കാണാനില്ല
ആദ്യത്തെ ക്ലാസും പകുതി പോയി
ഇപ്പോഴെങ്ങാൻ ചെന്നാൽ തല്ലും കൊള്ളും
മുറ്റത്തെ പ്ലാവിന്റെ ചോട്ടിൽ നിന്നാൽ
ആരുമേ കാണാതെ നേരം കൊല്ലാം
ആദ്യത്തെ പീരീഡ് പോയിക്കിട്ടി
ബെല്ലടിച്ചപ്പോഴേ ഉള്ളിൽക്കേറി
എന്തെല്ലാം കാര്യങ്ങൾ കേട്ടറിയാൻ
ഷാനൂന്റെ മുത്തപ്പൻ തൂങ്ങിച്ചത്തു
മിന്നേടെ വീട്ടിലെ പൂച്ച പെറ്റൂ
സാറാമ്മ ടീച്ചറും ട്രാൻസ്ഫറായി
കാര്യങ്ങൾ കേട്ടതും ബെല്ലടിച്ചു
ചോറുണ്ടു വായും കഴുകി വന്നു
വയ്യാത്ത കാലുമായ് പന്തുതട്ടി
മർമാണി വന്നെന്റെ കാൽ തിരുമ്മി
ഉച്ചയ്ക്ക് വേറൊരു മാഷ് വന്നൂ
ഭൂമീടേം ചന്ദ്രന്റേം കാര്യം ചൊല്ലീ
പിന്നിലെ ബെഞ്ചിലെ പത്രക്കാരോ
ഭാമേടെം ചന്ദ്രന്റേം വാർത്ത ചൊല്ലീ
ക്ലാസുകൾ തീർന്നെന്ന് ബെല്ലു ചൊല്ലീ
പുസ്തക സഞ്ചി ഞാൻ തോളിലേറ്റി
ഇന്നത്തെ കാര്യങ്ങളങ്ങിനെ പോയ്
നാളത്തെ കാര്യവും വേറെയല്ല
വീട്ടിലേക്കെന്തിന് വേഗം പോണം
എങ്ങിനെയെങ്കിലും നേരം പോണം
അമ്പലമുറ്റത്ത് പീപ്പിൾസ് ക്ളബ്ബിൻ
വോളീ ബോൾ മത്സരം കണ്ടുനില്ക്കാം
അച്ഛനുമേട്ടനും അവിടെയുണ്ട്
സ്വാമി വലിക്കുന്നോരമ്മാവനും
വേലിക്കുമപ്പുറം പന്തുപോയാൽ
അപ്പോഴേ ഞാനൊരു താരമാവൂ
വയ്യിട്ടു പോകേണമമ്പലത്തിൽ
തോറ്റം പാട്ടുണ്ടെന്നു മുത്തി ചൊല്ലീ
ഒക്കെയും തീരുമ്പോൾ കട്ടച്ചോറും
പായസോം ചേർന്നുള്ളൊരൂണും കിട്ടും
അത്രയും നേരം ഞാനെന്തു ചെയ്യും
അമ്പലമുറ്റത്തും കൂട്ടരുണ്ടേ
കൂരിരുട്ടത്തീക്കളികളിക്കാം
തോറ്റാലും വീണാലും കൂട്ടച്ചിരി
വീട്ടിലൊന്നെത്തിയാൽ ചക്ക തിന്നാം
റേഡിയോ പാടുന്ന പാട്ടു കേൾക്കാം
മണ്ണെണ്ണ നാറുന്നൊരുൾമുറിയിൽ
മുത്തശ്ശി ചൊല്ലുന്നതെല്ലാം കേൾക്കാം
എട്ടുമണിക്കാണുറക്കമിന്നും
പത്തു മണിക്കൂറും ഞാനുറങ്ങും
മട്ടുപ്പാവുള്ളൊരു വീടും കാറും
ഇന്നുമെൻ സ്വപ്നത്തിൽ കണ്ടീടണേ