സ്വപ്‌നങ്ങൾക്കു ചിറകുകൾ മുളച്ചാൽ,
മായാലോകത്തിൽ പറന്നുയർന്നിടാം.
കാണാത്ത കാഴ്ചകൾ കണ്ടു നടക്കാം,
പക്ഷങ്ങളൊടിഞ്ഞാൽ തീർന്നൂ കഥയും.
കുഞ്ഞു കുഞ്ഞു സ്വപ്‌നങ്ങൾ കണ്ടും കൊണ്ടു,
ജീവിതം തള്ളിനീക്കാം ഈ ഭൂമിയിൽ.
പൂവണിയണം സ്വപ്നങ്ങളൊക്കെയു-
മെന്നുള്ളയാ മോഹങ്ങൾ മറന്നിടാം.
സ്വപ്നങ്ങളൊക്കെയും പൂവണിഞ്ഞാലും
സന്തോഷിക്കവേണ്ടായധികമാരും!
ഖേദിക്കവേണ്ടാ പൂവണിഞ്ഞില്ലെങ്കിൽ,
എല്ലാ സ്വപ്നങ്ങളും പൂവണിയുമോ?
അത്യാഗ്രഹമൊട്ടുമില്ലാതെ നമ്മൾ,
ഉള്ളതുകൊണ്ടോണംപോലെ ജീവിച്ചാൽ...
കാണാതിരുന്നാൽ വലിയ സ്വപ്‌നങ്ങൾ,
ശാന്തിയോടെ ജീവിതം നയിച്ചിടാം.
സ്വപ്‌നങ്ങൾ വെറും സ്വപ്‌നങ്ങൾ മാത്രമായ്-
ക്കണ്ടു ജീവിതം സന്തോഷമാക്കിടാം.
സ്വപ്നങ്ങളുടെ പിറകേ പോയിട്ടു
നാം, ജീവിതം പാഴാക്കാതിരിക്കണം!
