കവിത 1: ഓർമ്മകളുടെ ഓണം.
ഓർമകളിലുറങ്ങിപ്പോയ
മറവിക്ക്,
അരങ്ങിലേക്ക് വരാൻ
അവസരം കിട്ടാതെപോയൊരു
കലാകാരന്റെ ഭാവമാണ്....
ഓർമ്മകൾക്ക്,
അകാലത്തിലെത്തിയ
വിരുന്നുകാരന്റെ ഭാവവും.
എങ്കിലും ഓർമ്മകൾക്ക്
ഓണക്കാലമാണ്;
ഓണത്തിന്റെ ഓണം പോലെ....
കവിത 2: ഇഷ്ടം.
സൗഹൃദം
ഹൃദയത്തിലൊളിപ്പിച്ച്
ആകസ്മികമായി പ്രത്യക്ഷപ്പെടുന്നൊരു
പ്രിയ സുഹൃത്ത്....
വാതിലിനു പിന്നിലെ ഇരുട്ടിലോ, ~
ഇടനാഴികളിലോ,
കോണിപ്പടിയുടെ ചുവട്ടിലോ
തിരഞ്ഞാൽ കാണില്ല....
എവിടെയോ സമർത്ഥമായി ഒളിഞ്ഞിരുന്ന്,
അപ്രതീക്ഷിത നിമിഷത്തിൽ
കടന്നു വന്ന്
ഒരു ഞെട്ടലിന് പോലും
അവസരം തരാതെ
കൂടെ കൊണ്ടുപോകുന്നൊരു പ്രിയ സുഹൃത്ത്....
എനിക്കിഷ്ടമാണ് നിന്നെ,
പറയണമെന്നുണ്ട്;
പക്ഷേ, വാക്കുകൾക്കതീതമാണത്....
