(പൈലി.ഓ. എഫ് തൃശൂർ.)
നഗ്നപാദത്തിൻ സ്‌പർശനമേറ്റൊരീ,
നാളുകൾ മാടിവിളിക്കുന്നുവെന്നെ.
നിഴലുകൾ മൂടുന്ന നാളെകൾക്കായ്...
ഊറുന്നു മിഴികളിൽ അശ്രുകണങ്ങൾ.
വൃശ്ചികക്കാറ്റിൻ വിസ്മയങ്ങളിൽ,
പൊഴിയുന്നുവെന്നിലെ ആത്മദു:ഖം.
നീർക്കുമിളയായ് മറയുന്നു ജീവിതം,
നിദ്രയിൽനിന്നുമുണർന്നിടാതെ.
നീർപ്പക്ഷികൾ പോൽ പറന്നുയരുന്നു
നീരദങ്ങളിൽ മറഞ്ഞിടുന്നു.
വിരിയുന്ന മുകുളത്തിൽ ചാരുതകൾ,
നീറുന്ന സ്വപ്നമായ് തീർന്നിടുന്നു.
നിശാശലഭത്തിൻ നൊമ്പരങ്ങൾ,
രോദനങ്ങളായ് പ്രതിഫലിക്കുന്നു.
നീലജലാശയം തേടിയെത്തുന്നു
നിദ്രയില്ലാത്ത നീരജങ്ങൾ.
നിഴലുകളിലും സുഗന്ധം പരത്തി,
നിർവൃതിയടയുന്ന നിശാപുഷ്പങ്ങൾ.
