കാലമിന്നെത്രയോ മോശമാണ്
കാലിക പ്രശ്നവും രൂക്ഷമാണ്
ചുറ്റും ചതിക്കുഴികളെന്നോർക്കുക
അറിയാതെ വീഴുന്നു ജീവിതങ്ങൾ..!
പ്രണയം നടിച്ചെത്തും വഞ്ചകന്മാരിന്ന്
പെണ്ണിനെ പിണമായി കാണുന്നവർ
പൊന്നും പണവും കവർന്നെടുത്ത്-
ജീവനെത്തന്നെ ഹനിച്ചിടുന്നു..!
ഒരുനാളെൻ ഹൃദയത്തിൽ മധുരമായി
പ്രണയത്തിൻ മണിമുത്തു വാരിവിതച്ചവൻ
പുഞ്ചപ്പാടത്തെ നെന്മണി പോലെന്റെ-
അനുരാഗപൂക്കളും താളത്തിലാടി..!
കാലം കടം തന്ന ജീവിതപാതയിൽ
കമനീയസ്വപ്നങ്ങൾ നെയ്തുകൂട്ടി
ഓടിയൊളിച്ചൊരാ തങ്കക്കിനാവുകൾ-
എന്തിനായെന്നിൽ വിരിഞ്ഞു നിന്നു.?!
പൊന്മകനൊന്നു പിറക്കുവാൻ മോഹിച്ചു
പൊന്നിൻ കിനാവുകൾ കാത്തു വച്ചു
മറ്റൊരു പെണ്ണിൻ പണവും പത്രാസുംകണ്ട് -
തന്നേ ചതിച്ചവൻ പാടേ അകന്നുപോയ്‌..!
അശനിപാതമായെൻ ശിരസ്സിൽപതിച്ചു
തകിടം മറിഞ്ഞുപോയ്‌ ജീവിതനൗകയും
ഹൃദയാന്തരാളത്തിലിന്നും പൊലിയുന്നു-
നഷ്ടവസന്തത്തിൻ പൊൻകിനാക്കൾ..!
