പ്രാർത്ഥിക്കാം ജഗദീശ്വരാ നിൻമുമ്പിൽ,
ഈ ഭൂമിയിൽ ജന്മം നൽകിയതിനും...
നല്ലതാം പൂക്കൾ നൽകിയനുഗ്രഹി-
ച്ചാനന്ദത്തിൻജീവിതം തന്നതിനും!
വന്ദിക്കാമാ ദിവ്യചൈതന്യത്തെയും,
കുമ്പിടാമാ തിരുപടികളിലും.
സ്നേഹം പങ്കിട്ടുനൽകിയാപ്പൂക്കളെ,
വാത്സല്യത്തോടെ വളർത്താം നമുക്കും.
നമ്മുടെ മാതാപിതാക്കൾ പകർന്നു-
നൽകിയൊരറിവുകളെയൊക്കെയും...
ചൊല്ലിക്കൊടുത്തിട്ടായിളം മനസ്സിൽ,
നന്മതൻ വിത്തുകൾ മുളപ്പിച്ചിടാം.
പ്രാർത്ഥിക്കാം നമുക്കിന്നാമരങ്ങളും
നന്നായ് വളർന്നു വലുതായിട്ടതിൽ...
വർണപുഷ്പങ്ങൾ വിടർന്നു സുഗന്ധം
പൂശട്ടെയീ വഴിത്താരയിലെന്നും.
