തൂവാനത്തുള്ളികൾ ചന്തം ചാർത്തിയ
കരിനീലച്ചിറകുകൾ വീശിപ്പറക്കും
മഴക്കാവിലെ കരിമുകിൽപക്ഷികളേ
ഇടയസഖിതൻ ശോകസാന്ദ്ര ബാഷ്പം
മധുരാപുരിയിൽ മഴദൂതായ് പെയ്യാമോ
നീലത്താമര മാറിലെ സ്മൃതിവേരിൽ
മയങ്ങിയുറങ്ങുമാ പൂർവ്വരാഗവല്ലികൾ
കണ്ണീർമണി മഴയിൽ തളിർത്താടുമോ
നീലമിഴിനിറഞ്ഞൊഴുകും രാഗശോണിമ
കാളിന്ദീതീരത്തെ രതിചക്രവാളമല്ലോ
ചിരകാലമൗനം നോൽക്കും വിരഹവും
നിത്യമിഴ നെയ്യും യൗവനശ്രീയുമായ്
മാനസജാലകം തുറന്നുവെച്ചിനിയും രാധ,
യുഗപ്പിറവികൾ കാത്തിരിക്കും
നിന്നിൽ നിറഞ്ഞു വിശ്വപ്രണയമാവാൻ.
