വെറുതെ ചാരിയിട്ട വാതിലിൽ 
കാറ്റു വന്നു എത്തി നോക്കി
കാറ്റിനു പുറകെയെൻ 
പാദങ്ങളും പിന്തുടർന്നു

എങ്ങും ഇരുട്ടായിരുന്നു
ഏകാന്തതയുടെ കനപ്പായിരുന്നു
വെളിച്ചം തേടി നടക്കുകയായിരുന്നു
എന്റെ പാദങ്ങൾ

പാഞ്ഞു പോകുന്ന വാഹനങ്ങളുടെ ഒച്ച ഞാൻ കേൾക്കുന്നുണ്ട്
പാതകൾ കടന്നു ഞാൻ
കാറ്റിനെ തന്നെ അനുഗമിച്ചു
കാറ്റു ചെന്ന് തിരകളെ തൊട്ടപ്പോൾ
പ്രണയാർദ്രമായ
സംഗീതം ഞാൻ കേട്ടു
ആഹ്ലാദം പൂണ്ട തിരകൾ 
പാദങ്ങളിൽ വന്നു തൊട്ടു

മുകിലുകൾ മഴ പൊഴിച്ചു
ആകാശത്തേക്കു നോക്കിയപ്പോൾ
മഴത്തുള്ളികൾ 
കൺപീലികളിൽ പതിച്ചു
ജലതുള്ളി സ്പർശത്തിന്റെ 
തണുപ്പിലേക്ക് കൺ തുറന്നതും
എങ്ങും വെളിച്ചം 
വെളിച്ചം മാത്രം
കൺ നീലിമയിലൂടെ
വെളിച്ചമൊഴുകുന്നു....