മുറുക്കിച്ചുവന്നൊരു പല്ലാൽ ചിരിക്കും
നുണക്കുഴിക്കവിളുള്ള മുത്തശ്ശി.
ഉണ്ണിക്കിടാങ്ങൾക്കൊപ്പം ചലിക്കും
സ്നേഹത്തണലാം മുത്തശ്ശി
വാടിത്തളർന്നു നാമൊന്നിരുന്നാൽ,
ആ മടിത്തട്ടിൽ മെത്തവിരിക്കും.
സന്ധ്യയ്ക്കു തിരിയൊന്നു തെളിയുമ്പോൾ,
ചൊടികളിൽനിന്നും കഥകളുതിരും.
നല്ലതു മറന്നു നാം നീങ്ങിടുമ്പോൾ,
അരുതുകളുതിരും അധരങ്ങളിൽ.
നാട്യങ്ങളില്ലാതെ,യുള്ളതു ചൊല്ലും
നാട്ടറിവു പേറും ഹൃത്തി,ന്നുടയവൾ.
