(T V Sreedevi)
കണ്ണാ നിനക്കായി
കാത്തിരിക്കുന്നിന്നും,
വൃന്ദാവനത്തിലെ
കൊച്ചു രാധ.
ഇന്നു നിൻ കോലക്കുഴൽ
വിളിനാദമെന്നുള്ളിൽ,
തുളുമ്പും വിരഹഗാനം!
നിന്റെ പാദസ്വനം
കാതോർത്തിരിക്കുന്ന-
യെന്മനം തേങ്ങുന്ന-
തറിഞ്ഞില്ല നീ!
നീലക്കടമ്പുകൾ
പൂക്കുമാറില്ലിപ്പോൾ,
കാളിന്ദി കളകളം
പാടാറില്ല!
നിൻ പൈക്കിടാങ്ങൾ
നിൻകാലൊച്ച കാതോർത്തു,
മേയാതെയെപ്പൊഴും
നോക്കി നിൽപ്പൂ!
ശ്രാവണ ചന്ദ്രിക
പുഞ്ചിരിക്കാറില്ല,
താരകപ്പൂക്കൾ
വിരിയാറില്ല!
വനമുല്ലകൾ പൂക്കൾ
ചൂടി നിൽക്കാറില്ല,
വനമാലി നിന്നെയു-
മോർത്തു നിൽപ്പൂ!
നിൻ മുരളീരവം
കേൾക്കാതെയെങ്ങനെ,
ഞങ്ങളുറങ്ങുമെൻ
ഗോപബാലാ!
താരണി മണിമഞ്ചം
ഞാൻ വിരിച്ചിട്ടിട്ടും,
പോരാത്തതെന്തു നീ,
വാസുദേവാ!
പൂമണിത്തെന്നലിൽ
ഒഴുകി വന്നെത്തുന്ന,
പൂവിൻ സുഗന്ധവു-
മറിഞ്ഞില്ല ഞാൻ!
നിൻ തിരുമേനിയിൽ
ചാർത്തുന്ന മലയജ-
നറുമണം മാത്രമേ
അറിയുന്നു ഞാൻ!
നിൻ രാഗ രേണുക്കൾ
മാത്രമണിയുന്ന
പാവമീ രാധയെ
ഓർക്കുമോ നീ!
