അനുഭവങ്ങൾ പകർന്നോരറിവുകൾ
അളവെഴാത്തതാം നവ്യസങ്കല്പങ്ങൾ!
സുരഭിലമാവുമാത്മാനുഭൂതികൾ
സുഖതരമായ സുന്ദരസ്വപ്നങ്ങൾ
നിനവിലെന്നും തെളിയുന്ന സാന്ത്വന -
സുമധുരിത മന്ദഹാസങ്ങളും
വിലമതിയാത്തൊരാത്മാനുരാഗവും
അരികിലെപ്പോഴുമെത്തുന്നൊരോർമകൾ!
ഇവിടെയിന്നീ മധു മലർവാടിക_
യധികമോഹനം, വർണസമ്മേളിതം
കവിമനസ്സിൽ കതിരിട്ടഭാവന-
യ്‌ക്കൊരുനിമിത്തമായ് വീണൊരീപൂവുപോൽ!
നിറയുമത്യന്ത ചേതോഹരാർദ്രമാം
കനവുകൾവീണുമണ്ണടിഞ്ഞില്ലയോ?
ചെറുതരംഗമുയർത്തുന്നതെന്നലും
മധുരിതമാം ദലമർമരങ്ങളും
ഇടയനന്നൊരാവേണുഗാനത്തിലൂ-
ടളവെഴാതെ പകർന്നൊരീണങ്ങളും
അധിക മോഹനം നിത്യവസന്തർത്തു -
അതിവിലോലമിന്നാനന്ദദായകം
അവിടെ നീയന്നുപാടിയപാട്ടിലൂ-
ടൊഴുകിയെത്തിയ രാഗാർദ്രഭാവവും
കരളിലിന്നും കുളുർമാരി പെയ്യുന്ന
കനവുപോലെഞാൻകാക്കുന്നിതിപ്പൊഴും !
