ഇടവപ്പാതിയിരമ്പി വരുമ്പോൾ
പെണ്ണിനിതെന്തൊരു പരവേശം
ഇറയത്തുള്ളൊരു കമ്പിക്കയറിലെ
മുണ്ടുമുടുപ്പുമുണങ്ങാഞ്ഞോ
കൊത്തി ചിക്കി നടക്കുംകോഴി-
പറ്റം കൂട്ടിൽ കയറാഞ്ഞോ
ഉപ്പും മുളകും വാങ്ങാൻ പോയോ-
രച്ഛനെ വീട്ടിൽ കാണാഞ്ഞൊ
തൈമാവിന്മേൽ താനേ കയറിയ
മൊട്ടു നിറഞ്ഞൊരു മുല്ലമലർകൊടി
കള്ള കാറ്റിൻ കയ്യിൽ തട്ടി
തലയും തല്ലി മലർന്നിട്ടൊ
കാറ്റിൽ വീണൊരു കദളി തയ്യിനു
കവണയൊരുക്കാൻമേലാഞ്ഞോ
മഴയിൽ നനയും പുള്ളിപശുവിനു
പുല്ലു കൊടുക്കാൻ വൈകീട്ടോ
തൊടിയിൽ കയറിയ
പുഴയിലെവെള്ളം
പടിപടിയായി പടവുകൾ കയറി
പൂമുഖ വാതിലിൽ വന്നിട്ടോ
ഇടവപ്പാതിയിരച്ചു വരുമ്പോൾ
പെണ്ണിനിതെന്തൊരു പരവേശം
