മികച്ച കവിതകൾ

(Beena Roy)

ഞാനൊരു ദേവതയായിരുന്നെങ്കിൽ
നിനക്കു ശാപമോക്ഷമേകിയേനേ,
നീയെന്ന വരണ്ട മരുഭൂമിയെ
ജീവൻ തുടിക്കുന്ന മരുപ്പച്ചയാക്കിയേനേ,

നിന്റെ ഓരോ കോണിലും
അസുലഭ- പുഷ്പ്പങ്ങളാൽ മാളിക പണിതേനേ,
നിന്റെ നിമ്നോന്നതങ്ങളിലൂടെ
ഒഴുകിയിറങ്ങുന്ന അരുവികൾ തീർത്തേനേ,
നിന്റെ ആകാശത്ത് മഴവില്ലുകൾ ചാലിച്ച്
പ്രണയചിത്രങ്ങൾ വരച്ചേനേ,
നിന്റെ നിദ്രയ്ക്ക് ഉടവുതട്ടാതിരിക്കാൻ
ഇളംകാറ്റിന്റെ വെഞ്ചാമരം വീശിയേനേ,
നിന്റെ ഉൾച്ചൂടേറ്റുവാങ്ങി,
നിനക്കുവേണ്ടി ഒരു മരുഭൂമിയായി പരിണമിച്ചേനേ...