mozhi2all.com
പുതിയ രചനകൾ mozhi2 ൽ സമർപ്പിക്കുക. (mozhi2all.com)
Login/Register
 

(ഷൈലാ ബാബു_

ദുര മൂത്ത മർത്യന്റെ
ആർത്തിക്കളത്തിലി-
ന്നൊഴുകുന്നു നിർദോഷ
രക്തപ്പുഴകളായ്!

 

ദാഹവിശപ്പിനാൽ

തളരുന്നു രാപകൽ;

കണ്ണീർക്കയത്തിലെ

നിർഭാഗ്യ സോദരർ!

 

മോഹന കതിർമണി

സ്വപ്നങ്ങളായിരം;

ചിത്രവർണങ്ങളാൽ

ശയ്യകൾ തീർക്കവേ...

 

മലയാള നാടിന്റെ

വിജ്ഞാന സ്രോതസ്സും

കുരുതിക്കളത്തിലെ

വെടിയൊച്ച ഭീതിയിൽ!

 

ധൂളിപ്പടലമായുയരുന്നു

സർവതും വാനിലായ്;

നാശം വിതക്കുമീ,

യുദ്ധക്കൊഴുപ്പിനാൽ!

 

ചിതറിത്തെറിക്കുന്നു

മർത്ത്യ ശിരസ്സുകൾ;

കത്തുന്നു ദേശങ്ങൾ

തീഗോളമായതാ!

 

ഇന്നീ രണഭൂവിലങ്കം

ജയിക്കുവാനിരുവരും,

അധികാര ഗർവിന്റെ

കനൽ വാരിയെറിയുന്നു!

 

മിടിക്കുന്ന ഹൃദയങ്ങൾ

ഞരങ്ങുന്നു ഭീതിയി-

ലണയാൻ വിതുമ്പുന്ന

തിരിനാളം പോലവേ!

 

ആകാംക്ഷ മുറ്റിയ

സുന്ദര വദനങ്ങളിലി-

ന്നാശങ്ക മാത്രമായ്;

മറഞ്ഞൂ ചിരികളും!

 

ഭിഷഗ്വരനാകുവാൻ

കൊതിച്ചൊരു പുത്രനു;

പ്രാണൻ ത്യജിക്കേണ്ടി

വന്നതു, ശിക്ഷയോ?

 

നുറുങ്ങും മനസ്സുകൾ-

ക്കാശ്വാസമായിടും

രക്ഷക ദൗത്യങ്ങൾ

പ്രതിബന്ധക്കുരുക്കിലോ?

 

തിരികെയെത്തീടട്ടെ

സുരക്ഷിതരായവർ;

ആശ്വാസതീരത്തിൻ

വായു ശ്വസിക്കട്ടെ!

ശ്രേഷ്ഠ രചനകൾ

നോവലുകൾ

 malayalam novels
READ