പാടാത്തപാട്ടിന്റെ മാധുര്യമാണു നീ
ചൂടാത്ത സൗഗന്ധികപ്പൂസുഗന്ധവും
തീരംതകർത്തുപായുന്ന മന്ദാകിനീ
വേഗപ്രവാഹചൈതന്യവും നീ..!
പൂക്കും വനമുല്ലയേകിയ സൗരഭ -
മേന്തിവരുന്നൊരിളംതെന്നലാണു നീ...
സപ്തവർണാഞ്ചിതമാരിവിൽ ഭംഗിയും
സപ്തസ്വരശ്രുതി കീർത്തനവും....!
അരുണോദയത്തിന്റെരാഗിലഭാവവും
അസ്തമയത്തിന്റെശാന്തിയും നീ
അലയാഴിപാടുന്നസാമസംഗീതവും
ആഴക്കടലിന്നപാരതയും
പഞ്ചമംപാടും കുയിൽനാദവും മുഗ്ദ്ധ -
മന്ദഹാസത്തിന്റെ മാസ്മരഭംഗിയും. .....
ഇല്ലെന്റെതൂലികയ്ക്കാവില്ല നിന്നിലെ -
നന്മയെച്ചെമ്മേ വരച്ചീടുവാൻ!
