(Thriveni Raj)
കൊച്ചി മുങ്ങിക്കഴിഞ്ഞു,
കൊച്ചി ജലമറയ്ക്കുള്ളിൽ
മറയുന്നു!
*തിമിംഗലകന്യകൾ മാളിന്റെ-
യുള്ളിലടയിരിക്കുന്നു;
കടലാമ, ബഹുനില ഫ്ലാറ്റിന്റെ
മസ്തകം മാന്തിപ്പറിക്കുന്നു!
കടൽപ്പായൽ മെട്രോതൻ
സ്റ്റേഷനിൽ
പുത്തൻ പടം വരയ്ക്കുന്നു!
റയിലിന്റെ നീണ്ട പാളങ്ങളിൽ
കടൽപ്പാമ്പു പടംപൊഴിക്കുന്നു!
കടലിന്റെയുള്ളിലെ
അസ്ഥികൂടങ്ങളിൽ,
കടൽപ്പുറ്റു പുഷ്പമർപ്പിക്കുന്നു!
പാർക്കിന്റെ യുള്ളിലെ
ജലസ്മശാനങ്ങളിൽ
കുഞ്ഞസ്ഥി കോലങ്ങൾ
ഉറഞ്ഞു തുള്ളുന്നു.
ആഗോളതാപനം,
മേഘവിസ്ഫോടനം,
വൻ തിരമാലകൾ;
കൊച്ചിയെ ജലസമാധിക്കു
വിധി നല്കി
ചെങ്കോലുഴറ്റുന്നു!
മൂന്നാറിലെരിയുന്ന രാത്രിയിൽ
ശീതീകരിച്ച മുറികളിൽ,
ഭിത്തി വിസ്താരടീവിയിൽ
പോയ കാലത്തിന്റെ കഥകണ്ടു,
പുത്തൻ തലമുറ
കഞ്ചാവെരിക്കുന്നു!
വിരുന്നിനെത്താറുള്ള
ദേശാടനപ്പക്ഷികൾ,
വഴി തെറ്റി, തേക്കടിക്കാട്ടിൽ
കൂടുകൂട്ടുന്നു!
പെരിയാറു തോടായി
കണ്ണീരൊഴുക്കിയാ-
മണ്ണിന്റെ ചേലയിൽ
മുഖം മറയ്ക്കുന്നു!
കാട്ടുകുറിഞ്ഞികൾ
പൂതേടിയുലയുന്നു,
തേയിലക്കാടുകൾ
കരിഞ്ഞുണങ്ങുന്നു!
പെരുമഴപ്പെയ്ത്തിന്റെ
രോമാഞ്ചമുൾക്കൊണ്ടു-
യുരുൾപൊട്ടി, ഹൈറേഞ്ചു
മൈതാനമാവുന്നു!
ഇതുവൻ ദുരന്തം
വരാനിരിക്കും ദുരന്തം!
കൊച്ചി ജലസമാധിയിൽ
മറയുന്ന, നാടിൻ ദുരന്തം!
--------------
* തിമിംഗലങ്ങൾ മുട്ടയിടാറില്ല. മാളിലെത്തി മറ്റുള്ളവയെ അനുകരിക്കുകയാണ്, പൊയ്മുഖ-മണിയുകയാണ്.
