പാതി വഴിയിൽ നിന്നും നീയെന്നെ തിരിച്ചയച്ച പരിഭവം
ഒരു നെരിപ്പോടായ് ഉള്ളിൽ കാത്തു വെച്ചിരിക്കുന്നു
മരണം വരെയും പ്രണയം മറന്നിടാൻ
മൗനം കൊണ്ടൊരു മുൾവേലി അനായാസം നീ തീർത്തു
അത്രമേൽ ഇഴുകിച്ചേർത്ത കണ്ണികൾ
കണ്ണീരാൽ കുതിർത്ത് നീ പൊട്ടിച്ചെറിഞ്ഞു
അളവറ്റ നോവിലും ഞാൻ നിന്നെ വെറുതേ നോക്കി
പ്രണയത്തിനു ഭ്രഷ്ടു കല്പിച്ചവരെ നീ പൂജിക്കയും
ഞാൻ വെറുക്കുകയും ചെയ്തു
എന്നും നാമങ്ങനെയായിരുന്നല്ലോ കാഴ്ചയും
കാഴ്ചപ്പാടുകളും എല്ലാം ഒട്ടടക്കം വിഭിന്നം
എങ്കിലും സ്നേഹത്തിൻ്റെ നീരുറവ
പ്രണയത്തെ ജീവിപ്പിച്ചു കൊണ്ടെയിരുന്നു
നിൻ്റെ ഓർമ്മകൾ എന്നിൽ ഉതിർക്കുന്ന
കണ്ണീർ കലർന്ന ജലപാനങ്ങളിലും
ഞാൻ നിന്നെ ഓർത്തുകൊണ്ടിരിക്കുന്നു
ഒപ്പം മൗനം കൊണ്ടു നീ തീർത്ത മുൾവേലിയും
