തൊടിക്കപ്പുറം മറഞ്ഞേ പോയ്
തീക്കറുപ്പൻ തുമ്പികൾ
കാലിലിപ്പോഴും കല്ലുവേദനിക്കുന്നെന്ന്
നിഴൽത്തുമ്പി
മഴകഴിഞ്ഞിട്ടും വരാതെയായ്
മുളവാലൻ തുമ്പികൾ
നിനച്ചിരിക്കാത്ത നേരത്തെന്നെ

തൊട്ടുരുമ്മിപ്പറന്നുപോയ് മലമുത്തൻ തുമ്പി
ഇനിയും പിടി തരാതെ
പറക്കുന്നു അരുവിയൻ തുമ്പി
ഓണത്തിനെങ്കിലും
വരാതിരിക്കില്ല
കടുവാത്തുമ്പികൾ
മുളങ്കാടുകളിപ്പോഴും
ഓർത്തുവെക്കുന്നു
ഇലപ്പച്ച തൊട്ടു പറക്കുന്ന
പെരുങ്കണ്ണൻ തുമ്പിക്കൂട്ടങ്ങളെ.
രാത്രി മരങ്ങളെ തൊടുമ്പോൾ
എന്നെ ചുറ്റിപ്പറക്കാറുണ്ട്
കുറേ നീർമുത്തൻ തുമ്പികൾ!