ഞാറ്റുവേലത്താളം പാടെ മറക്കുവാൻ
തിരുവാതിരയ്ക്കെന്തു പറ്റീ?
മഴനൂലു പൊട്ടാതെ മണ്ണിലേക്കെത്തിയ
കുളിരിന്റെ തുള്ളികളെങ്ങേ?
ഏതൊരു കശ്മലൻ വീട്ടുതടങ്കലിൽ
നിന്നെയൊളിപ്പിച്ചു വെച്ചൂ?
ആകാശനാട്ടിലെ പീഡനമേറ്റു നീ
കണ്ണീരൊലിപ്പിച്ചിരിപ്പോ?
രോഗാതുരയായ്ക്കിടക്കയോയാതിര
പനിവന്നു വയ്യാതെയായോ?
ലഹരിക്കടിമയായ് പെയ്യാൻ മറന്നു നീ
ദു:ഖിച്ചു ദൂരേക്കകന്നതാണോ?
കാശിയോ, കേദാരനാഥിലോ ചുറ്റിയോ
ദേവനെക്കണ്ടു മറന്നു നിന്നോ?
പൃഥ്വിക്കു തലചുറ്റി ഭ്രമണം പിഴച്ചുവോ?
ഋതുതാളം ശ്രുതിഭംഗമായോ?
പേടിപ്പെടുത്തുന്ന ഏതോ വിനാശത്തിൻ
ചിറകൊച്ച കേൾക്കുന്ന പോലെ!
അടിവെച്ചടിവെച്ചടുക്കുമപചയം
ചിലമ്പൊലി തീർക്കുന്ന പോലെ!
താളംപിഴയ്ക്കാത്ത ഞാറ്റുവേലത്തുടി-
പ്പാട്ടുമായണയട്ടെ കാലം!
സത്യമങ്ങാകാതിരിക്കട്ടെ ശങ്കകൾ
ശംഖൊലി തീർക്കട്ടെ നല്ലകാലം!
