User Rating: 4 / 5

Star ActiveStar ActiveStar ActiveStar ActiveStar Inactive
 


ഇന്നു വിരിഞ്ഞിളം ചെമ്പനീർ പൂക്കളിൽ 
നിന്നു കവർന്നുവോ നിൻ ചൊടികൾ 

മന്ദസ്മിതത്തിൻ അഴകും സുഗന്ധവും 
സിന്ദൂര വർണ്ണവും പേലവാംഗി?

ചാരു മരാളികേ നിൻ ചലനോന്മാദ
ചാരുതയാകെ പകർന്നേകിയോ 
ചേതോഹരാംഗിതൻ പാദങ്ങളിൽ ചൈത്ര 
കേളീ ഗൃഹത്തിലണഞ്ഞിടുമ്പോൾ? 

വാസര സ്വപ്‌നങ്ങൾ ഉൽഫുല്ല മാകുന്ന 
കാതരമാം മിഴി ക്കോണുകളിൽ    
ആരുപേക്ഷിച്ചു മലർ ശരങ്ങൾ 
മമ മാറിട മെയ്തു മുറിച്ചീടുവാൻ?

തെന്നലേ പൊൻ മുളം തണ്ടിലൂടീ നിശാ 
സംഗമ തീരത്തണഞ്ഞിടുമോ;
സുന്ദര മീ നിലാ ചർച്ചിത വേദിയിൽ   
മന്ദാര പുഷ്പം വിടർന്നിടുമ്പോൾ?